Mamlaka ya Maendeleo ya Biashara Tanzania

Mamlaka ya Maendeleo ya Biashara Tanzania (TanTrade) imefanya kikao muhimu na wadau wa sekta binafsi pamoja na Jumuiya za Wafanyabiashara Taifa (JWT) kwa lengo la kuimarisha ushirikiano na kurahisisha njia za kuwahudumia wafanyabiashara nchini. Hatua hii ni sehemu ya mkakati wa Mamlaka kuhakikisha wadau wa sekta binafsi wanashirikishwa kikamilifu katika maamuzi na mipango ya kukuza biashara, sambamba na kuimarisha mchango wa sekta binafsi katika uchumi wa taifa.

Kikao hiki kimejumuisha wadau kutoka jumuiya na vyama mbalimbali vya kitaifa, ikiwemo Chemba ya Wanawake Wafanyabiashara Tanzania (TWCC), Jumuiya ya Wafanyabiashara Tanzania (JWT), Chama cha Wamiliki wa Mabasi Tanzania (TABOA), Chama cha Wamiliki wa Malori Tanzania (TAMSTOA), Shirikisho la Sekta Binafsi Tanzania (TPSF), Chemba ya Taifa ya Biashara (TNCC), pamoja na Shirikisho la Viwanda Tanzania (CTI). Ushiriki wao unaonesha dhamira ya pamoja ya wadau wa sekta mbalimbali kushirikiana katika kutatua changamoto na kuendeleza biashara kwa uwazi na mshikamano.

Aidha, kikao hiki kimekuwa jukwaa la kupokea maoni, changamoto na mapendekezo ya wadau ili kupata suluhisho la pamoja. Kupitia mashirikiano haya, TanTrade inalenga kuimarisha mazingira ya biashara, kuongeza ushindani wa bidhaa za Tanzania, na kuchochea maendeleo ya kiuchumi kupitia sekta ya biashara. Hatua hii pia inahusiana na maboresho ya Business Clinic dawati la huduma linaloshirikisha taasisi zote wezeshi ambapo wafanyabiashara hupata huduma kwa haraka na kwa uwazi, bila urasimu.

Kwa ujumla, kikao hiki kimeonesha kuwa TanTrade si tu chombo cha kusimamia biashara, bali pia ni daraja la kuunganisha sekta binafsi na Serikali, kuhakikisha Tanzania inakuwa na mazingira bora ya biashara, yenye ushindani na yenye mchango mkubwa katika maendeleo endelevu ya taifa.