Dodoma, Tanzania Agosti 2026
Waziri Mkuu wa Jamhuri ya Muungano wa Tanzania, Mhe. Dkt. Mwigulu Lameck Nchemba (Mb), amefungua rasmi Maonesho ya Kitaifa ya Kilimo (Nane Nane) yanayofanyika kitaifa katika Viwanja vya Nzuguni, Dodoma. Katika hotuba yake ya ufunguzi, Dkt. Nchemba amesisitiza umuhimu wa uzalishaji wa bidhaa bora za kilimo ili kuongeza ushindani wa Tanzania katika masoko ya kimataifa. Amesema kuwa ubora, thamani ya kuongeza (value addition), na uhalisia wa bidhaa za kitanzania ni nguzo muhimu za kuvutia wanunuzi wa kimataifa na kuimarisha taswira ya Tanzania kama mzalishaji wa kuaminika.
Aidha, Waziri Mkuu ameeleza kuwa sekta ya kilimo ni mhimili wa uchumi wa taifa, ikichangia ajira, usalama wa chakula na ukuaji wa uchumi shirikishi. Amewataka wakulima, vyama vya ushirika na wadau wa kilimo kuzingatia matumizi ya teknolojia za kisasa, kuwekeza katika usindikaji, na kufuata viwango vya kimataifa vya ubora na vyeti ili bidhaa za Tanzania ziweze kushindana kimataifa.
Katika maonesho haya, Mamlaka ya Maendeleo ya Biashara Tanzania (TanTrade) inashiriki kwa kutoa elimu juu ya fursa za kilimo biashara na kuhamasisha umuhimu wa kutumia Nembo ya Taifa ya Bidhaa “Made in Tanzania”. Nembo hii inalenga kuongeza imani ya watumiaji, kuimarisha utambulisho wa bidhaa za Tanzania, na kusaidia wazalishaji wa ndani kupanua masoko yao.
Pamoja na majukumu mengine, TanTrade imeendelea na jukumu la kutafuta masoko ya bidhaa za kilimo ndani na nje ya nchi, ikishirikiana na wadau wa sekta ya kilimo na biashara ili kuhakikisha wakulima na wazalishaji wa Tanzania wanapata fursa pana za kibiashara na kuongeza kipato.
Maonesho ya Nane Nane, ambayo hufanyika kila mwaka, yameendelea kuwa jukwaa muhimu la wakulima, watafiti, wabunifu na watunga sera kubadilishana maarifa, kuonesha ubunifu na kuimarisha ushirikiano unaolenga kuendeleza sekta ya kilimo nchini.
