Mamlaka ya Maendeleo ya Biashara Tanzania

21 Aprili 2026, TanTrade HQ, Dar es Salaam

Tanzania na Jamhuri ya Kidemokrasia ya Kongo (DRC) zimefungua ukurasa mpya wa kuimarisha ushirikiano wa kibiashara unaolenga kuimarisha biashara ya kikanda na kuongeza uwekezaji baina ya mataifa haya mawili. Hatua hii imejidhihirisha baada ya maafisa kutoka DRC kutembelea ofisi za TanTrade kwa mazungumzo zaidi, kufuatia kumalizika kwa Kongamano la Ziwa Tanganyika lililofunguliwa rasmi na Waziri Mkuu wa Tanzania, Mhe. Mwigulu Nchemba, na ambalo lilishirikisha Wakongo wengi waliovutiwa na maonyesho hayo. Kongamano hilo limekuwa jukwaa la majadiliano ya kimkakati na kubadilishana mawazo ya kibiashara kwa manufaa ya wananchi wa pande zote mbili.

Mkurugenzi Mkuu wa TanTrade, Dkt. Latifa Khamis, alisisitiza kuwa TanTrade ni daraja la biashara kati ya Tanzania na mataifa ya nje, akiwakaribisha wafanyabiashara kutoka DRC kutumia fursa zilizopo nchini. Alieleza kuwa Tanzania imejipanga kutumia lango la magharibi kupitia Kigoma katika kuimarisha biashara kwenye nchi za Ushoroba wa Kati kwa kurahisisha huduma za usafirishaji na upatikanaji wa bidhaa za viwandani na vyakula, ili kuongeza mchango wa sekta binafsi katika uchumi wa kikanda. Aidha, alibainisha kuwa TanTrade itaendelea kushirikiana na taasisi za kikanda na kimataifa ili kuhakikisha kuwa Tanzania inabaki kuwa kitovu cha biashara na uwekezaji katika ukanda wa Afrika Mashariki na Kati.

Kwa upande wake, Gavana wa Jimbo la Kivu Kusini (Bukavu), Profesa Jean-Jacques Purusi Sadiki, amewahimiza wafanyabiashara wa Tanzania kuwekeza nchini DRC, akibainisha kuwa kuna nafasi nyingi za kibiashara na uwekezaji katika sekta mbalimbali ikiwemo kilimo, viwanda, nishati, madini, na huduma za kijamii. Aliongeza kuwa serikali ya DRC itaendelea kuhakikisha mazingira salama na rafiki kwa wawekezaji, ili kuimarisha uhusiano wa kiuchumi na kukuza biashara ya kikanda. Gavana pia alisisitiza umuhimu wa kuendeleza miradi ya pamoja ya miundombinu, hususan barabara na bandari, ili kurahisisha mtiririko wa bidhaa na huduma kati ya mataifa haya mawili.

Aidha, Gavana ameishukuru TanTrade kwa mwaliko wa kuja kushiriki Maonesho ya 50 ya Biashara ya Kimataifa SabaSaba, na amesema ataambatana na wafanyabiashara wakubwa ili kupata fursa zaidi za biashara katika maonesho hayo yatakayoanza tarehe 28 Juni 2026. Ameeleza kuwa ushiriki wa DRC katika maonesho haya utakuwa ishara ya mshikamano wa kikanda na utatoa nafasi ya kuendeleza majadiliano ya kimkakati kuhusu biashara, uwekezaji na ushirikiano wa kiuchumi.

Ziara hii imeweka msingi wa ushirikiano wa muda mrefu, ambapo Tanzania na DRC zinatarajiwa kuimarisha mtandao wa biashara kupitia mipango ya pamoja, kubadilishana uzoefu wa kiuchumi, na kuendeleza miradi ya kipaumbele inayolenga ustawi wa wananchi wa pande zote mbili. Hatua hii pia inatarajiwa kuongeza mchango wa sekta binafsi katika ajira, mapato ya serikali, na ukuaji wa uchumi wa kikanda.

Kwa ujumla, Kongamano la Ziwa Tanganyika limekuwa chachu ya kuimarisha diplomasia ya kiuchumi, likitoa dira mpya ya ushirikiano wa kikanda na kuonyesha dhamira ya Tanzania na DRC katika kujenga uchumi imara, shirikishi na endelevu.